經常和不同日本卡通品牌合作的富山麵家今次竟然聯乘角落生物，將餐廳裝修成一間角落生物主題的拉麵店，為期1-8-2025至30-11-2025，身為角落生物粉絲當然要去試下。
富山麵家將店鋪門面、餐廳內每個角落都變成角落生物主題，
枱面、牆壁、紙杯、筷子套、碗碟、牙籤包裝都是角落生物圖案，
牆上仲掛上肥貓、恐龍、企鵝、白熊、炸豬的畫像，
周圍都有巨型角落生物大公仔俾人打卡。
餐廳不停播放角落生物的主題音樂，我甚至覺得比我在日本去過的角落主題餐廳更有誠意。
除了角落主題食物，fans仲可以買到富山麵家推出的角落生物限定，
例如珍藏拉麵碗$150和環保袋$78，購買任何產品仲會送角落生物鎖匙扣。
Follow, like 和share官方富山麵家社交平台仲有角落A4 文件夾送。
黑醬油拉麵 $90
和風魚片印上炸豬可愛模樣，材料豐富，有炆得入味的秘製豬軟骨、溏心蛋、紫菜、竹筍、叉燒、心形玉子等。
濃湯以醬油為基底，味道甘醇不死鹹，叉燒脂香滿瀉，
豬軟骨肉質軟嫩，粗麵條掛湯力特強，盡吸黑醬油湯汁精華。
冷麵 $85
上桌時會把冷麵跟醬汁分開，醬汁可選胡麻醬或冷麵汁。
胡麻醬有濃郁芝麻香氣，微酸微甜，口感濃稠，撈落順滑彈牙麵條，
配上豐富材料，有手撕雞肉、魚片、番茄、玉子、蟹柳、鮮蝦和青瓜，口感清爽不油膩，夏天食就最舒服。
栗子紫薯餅 $28
外層酥脆，紫薯薯蓉口感軟綿，加上栗子粒，味道幽香甘甜。
串燒雞軟骨$38
味道鹹香，口感爽脆又有嚼勁。
特製芭菲$48
材料有雲呢拿雪糕、新鮮士多啤梨、藍莓、年輪蛋糕，低層仲有士多啤梨奶凍，酸酸甜甜，口感味道豐富。
白桃烏龍奶茶$35
兩杯特飲都有角落生物樣貌的棉花糖，面層有柔滑忌廉和脆脆糖粒，溝上甘醇的白桃烏龍奶茶，味道香濃。
特製荔枝梳打$35
色彩繽紛，面層忌廉軟滑，荔枝梳打入口冰爽透心涼。
富山麵家
銅鑼灣希雲街7號地舖
0 意見